Tn-Planet

يوم الخميس 3 ديسمبر مشيت تفرّجت في مسرحيّة ( le comédien King Lear) اللي يعني عنوانها بالعربية "الممثل الملك لير" نص و إخراج هشام رستم .يبدو من عنوانها و من "الأفيش" المكتوبة بالفرنسيّة أن هذا العمل موّجه للجالية المتكلّمة بالفرنسيّة القاطنة بتونس. بدأت المسرحيّة ياخي طلعو الممثلين يتكلّمو بالعربي. المسرحية فيها 4 لوحات : 1- مشهد من مسرحية "الملك لير" حوار بين الملك لير و المهرّج متاعو 2- الممثل اللي يتقمص دور "لير" و حارس المسرح 3- الممثل و حارس مركّب ثقافي 4- الممثل بعد 20 سنة يترقّب مدير المسرح البلدي في بهو نزل. وخيكم بديت نتقلّق من اللوحة الثانية لأنّي المسرحية نعرفها و هي موش من تأليف هشام رستم. أحنا كمشة من الناس قلنا بعد العرض أن العمل مقتبس من مسرحية ( le chant du cygne) لأنطون تشيكوف. و كان من المستوجب أن يقع تنصيص هذا في معلّقة المسرحيّة. نصّ هشام رستم مترهّل و ضعيف إلى أقصى درجة حاول من خلاله انّو يركّز على مرارة وضع ممثل أفنى حياتو على خشبة المسرح و لم يحصل على شيء : خذاه النوم في لوج و ما تفطّن ليه حتى واحد، الناس من حوله ما عادش تحب المسرح الكلاسيكي،المسرح متاعو باش يهدموه، و الإدارة ما عادش مهتمّة بيه. أغلب المتفرّجين قاعدو باهتين . قعد هشام رستم يجري فوق الركح ويصيح "...اطعموني و لا تكرّموني..كما قال المرحوم عبد اللطيف الحمروني..". على شكون يتكلم هشام رستم؟ ياخي نسى أش كان يقول من أسبوعين؟ ينوّه...و يثمّن...و يهنّي...و يشكر...و يندّد...أنا و رحمة أمّي ما عاد فاهم شيء.

الجانب الإخراجي و التقني كان ضعيف. أكثر المشاهد تاقع تحت إنارة من الفوق "دوش"بلا استعمال اضاءات جانبية تمكن المتفرّج من انّو يشوف ملامح الممثل.تخرج الشخصيّة من تحت دائرة الضوء ما عاد ترى شيء و لا تفهم علاش هاك الشخصيّة خرجت و الا رجعت. لا طرافة و لا ابتكار في الملابس. ديكور؟؟؟؟ مجرّد ستار شفّاف في آخر الركح يتحرّكو وراه جزء من الممثلين (ولات الحكاية موضة في المسرحيات التونسية). التمثيل "بازيك" طاريفة الحاكم.الممثلة "مارتين القفصي" كارثة في المسرحية و ما تعرفش تمثّل. البالي اللي مدخلينو يرقص شنوّه محلّه في السرد. لا عندو لا رأس و لا ساس و لا محلّ له من الأعراب الدرامي. المسرحية هاذي باش نحطها في خانة "à oublier " . حاصيلو خوكم قصّة اون لاين رجع للدّار لا فارح(ضيّعت وقتي) و لا مسرور.