Tn-Planet

تقولها وقت تحس بروحك ماش تنطق, ما تسب شخص, ماش تشدّ خناقه ماش تعمل حاجة اللي تخليك بعدين في حل و اربط

اللهم اني صائم, لازم تقولها وقت تلقى عندك بناي و معلم متع مرمة قاعد يبنيلك و يكسرلك كردونة فايونس سوم الميترو متعها 24 دينار, أما وقت يزيد كيسر ثلاثة أخرين وقتها تزيد تستعوذ, و تقول دفع الله ما كان أعظم و تقول : اللهم اني صائم

يزيد يركب الفايونس معوج, و يقلك البلاصة ذويقة, و يزيد يركب الجليز معوج و يزيد يكسرلك الحلقوم متع الصرف الصحي و يزيد يفيقك على الصباح و يقلك الفتورة ماش تزيد 500 دينار, فأقول اللهم اني صائم

تمشي تقضي تشوف الغشة و تقلو للبياع فاش تعمل , يقلك سامحني ... فتقول اللهم اني صائم

تجي تشوف تلقى القفة تتهز في الحومة و يجي شكون يقلك شبيك جابد روحك, وقتها نقول اللهم اني صائم

نمشي نهز الكرهبة و نخرج ترف و تشوف تحديد للسرعة فيه 50 كلم, و تشوف شكون شده الأمن يخطي فيه على السرعة المفرطة, و تجي بحذاك سيارة لحرس المرور و يجري في 80 كلم/س رغم تحديد السرعة , و تقعد بهات كيفاش الساهر على تطبيق القانون يخالف, تقول اللهم اني صائم

تحل التلفزة و تشوف سلعة تخليك تفطر , تسكر و تقول الله اني صائم

تحل الأنترنات و تجيك على خبر كيف هذا :

وقتها تقول : اللهم اني صائم و نحب نقعد صائم... أما كان خلاوني أولاد الحلال

نخبة الخمسة و الستين

حين تلتقي الأمم لتتنافس فان كل أمة تأتي بنخبة عقولها, في مختلف المجلات : اقتصاد, طب, علوم, قادة عسكريين, باحثين

فيأتي كل فرد بما أنجزه و ما قدمه لشعبه و للبشرية, فيكون الحظر هم المنتنافسون و الحكم, يقف كل فرد أما الحشد ليستعرض ما قدّم, فيقولون له أحسنت اذا أحسن العمل, و يشمئزون منه اذا ما أساء التصرف, و يمقتونه اذا ما كان عون على الخطأ, فما بالك اذا شجع عليه؟

في المدة الفارطة قدمت قائمة من خمس و ستين فردا لرئيس الجمهورية طلب للتمديد بعد سنة 2014, في حين أنه دعوة صريحة لمخالفة الدستور, لكن المتأمل في قائمة الخمس و ستين, يجد أنها تحتوي نخبة العقول التونسية في مختلف المجلات, أو الصف الأول ان صحّ التعبير, الصف الأول الذي من المروض أن تقيم بانجزاته البلاد , و به يكون الحكم على حال تونس في المحافل الدولية

فاذا وقف العلماء, و جاء من لم تعقه اعاقته على أن يكون أحد أكثر العقول براعة و ابداع, كحال ستيف هوكين

اللذي أبدع في مجال الفزياء النظرية على مستوى العالم أجمع, تجد أنه لم يقدم طلب لجورج بوش للتمديد رغم أنه الذي قاد الحرب على ما عرف بالارهاب و رغم أنه الذي أطاح بنظام طالبان و رغم أنه الذي جعل يد الشعب الأمريكي على مستودع للنفظ و لم يطالب بجكم كونه بريطانيا أن يغير الدستور لمصلحة الملكة, و لكن اذا جئنا بالسيد محمد الأوسط العياري , نجد أنه يقدم طلب مخالفة الدسور و يوقع على عريضة تجمع فيها اسمه باسم بعض الذين عرفُ بالعهر السياسي و الفنّي و الاعلامي

حين تقف أمام نخبة من العقول و النخب التي يفترض أنها تمثل صفة الصفوة, و ترى فيها ما ينكره المنطق و الأخلاق, و تجد أنها لم تحترم الشعب حين تدعي أنها تتحدث نيابة عنه... تشعر بالخزي و العار لأنهم أبناء بلدك

السادة النخب أصحاب الأسماء الواردة في قائمة الخمسة و الستين, لقد ألمني أن أرى الشيء الذي أقدمتم عليه , و حديثي موجه للعلماء و ليس للبعض المنحطين المذكورين في القائمة, اليوم اني أجد نفسي مشتت محطم, فكيف يأتي من درس حتى اعتبر علامة ميدانه ليقوم بفعل شنيع مثل الذي حصل؟

في وكالة ناسا يوجد مهندس هندي من بين كل عشرة عاملين هناك, فلو قدر الله أن تنتقل ناسا الى بلد لاقدر الله, لما وجدت خير من الهند مستقرا لها, و مع هذا لم أجد من طالب رئيس حكومة هندية بأن يمدد في ولايته بما يخالف القانون

لقد تبين أنكم نخب زائفة, و الأن بدأت مبادرة الألف, أو الصف الثاني من المثقفين, و عن قريب سيبدأ الصفّ الثالث لجمع العشرة ملايين , بأطفالهم و رضعهم و شيوخهم و موتاهم, ان لم يتم استعارة بضعة ملاييين قصد تدعيم المنتوج المحلي و ذلك عبر استخدام الفائض من المناشدين من كل من الصين و كوريا

سحقا لكم من نخب زائفة

رسالة شكر و تقدير من مواطني بن قردان

حاجة عادية ... حاجة عادية

وقت تسافر, تشوف برشا حوايج جديدة, في أمستردام على سبيل المثال, وقت تكون تحوس تصادف محلات عندها فترينة, في الفترينة تلقى سلعة , من بعيد تعيطلك, تضحكلك و تقلك تحبش؟

في الواقع في الفترينات هذه, تلقى ثما مومسات, في المحلات المجودة في قلب بعض العواصم الغربية تستغل الأسلوب هذا للاغراء, و نفس الشيء تقريبا موجود في بلجيكا ... لكن الحمد لله انك وقت ترجع لبلادك تلقاك مرتاح ان المنظر هذا ما تشوفوش

يتعدى الوقت و يجي رمضان ... و يبدأ شهر العبادة أو هكذا كان يسمى الى عهد قريب , لكن في القرن الحادي و العشرين, يتحول الى شهر الفرجة و المسلسلات, كل قناة تعرف انه من أكثر المواسم مردودية ... كل واحد يعرف أش يسعده, تحل التلفزة الوطنية , وقت تقول التلفزة الوطنية فانك تحكي على قناة يصرف عليها دافعُ الضرائب, حك جيابك

تقعد قدام تونس رقعة و تبدأ تتفرج مع العائلة, و تسب روحك على العملة

و بعد ما تحلها تشوف الفظائع, تي أش فيها؟ بنية تجي و يتم التعريف بيها كبائعة هواء, أش فيها؟ ماعندهاش الحق تمارس التجارة؟ توّا البنية عملت العيب؟ تي هوّا سامي الفهري يقول نورمال, أش بيها؟ موش نورمال؟

كيف البنية الحلوة اللي يجيبوها زوز أولاد للبرتمان باش يعديو سهرة في طاعة الله, أش فيها؟ تي خوات, مبيناتهم شيء, نيتهم صافية, أش فيها؟

و الا اذا راجل يعمل صحبة على مرته, أش فيها؟ عيب؟ حرام؟ و الا , سيب علينا من لوغة قال الله و قال الرسول, على خاطر شيوخ الفضائيات التونسية , ميحبوش يخوضو في الحكياة, أش لازم يتحككو, لان الحديث متع قال الله تعالى , ما يمشي كان مع العامة, رغم أن ربي ما يميزش بين العامة و الخاصة, و بين الغني و الفقير, أما هل يفسد النفاق الصيام؟

تو انت تحل التلفزة , و تشوف عينة راقية من الكادحات في صمت, بائعة أكسيجان, تتعطر, و تتجمل, و تتزين, و تحب تفتنك بحسنها, أش فيها؟ موش نورمال؟ عادي, تي خليك اسبري , شبيك متعصب؟ و متطرف و ما الى ذلك من اللوغة الزبلة متعه الشلايك اللي غزات التلفزة الوطنية, حلوة اللقطة ان فلوسي اللي ندفع فيها تمشي في تشجيع العهر الاعلامي التونسي... كيف كل مواطن يخلص في الفاتورة متع الستاج

توا بالأمس وقت قال ثقيل الظل , العبدلي عدة نكات سخيفة و جارحة, قالو نورمال , و اليوم نفس الشعار : نورمال

جماعة النورمال هاذم, بالمجد يحكيو؟ توا عادي باش شخص يصوحب على مرته و يمارس مع عشيقته الجنس؟ ملا في عائلاتهم نورمال؟ بوهم مصوحب؟ أمهم مصوحبة؟ أخته مصوحبة على راجلها؟ و الا ما يرضاوش؟ و عادي؟

هذا الكل في كفة, و مشهد مضاجعة على الملأ في كفة, قول علينا في فيلم بورنو, قال شنوّا عادي

أحس بالغربة في موطني

أحس بالغربة , أحس بأني الغريب بين أهلي و أصحابي

هل رأيت اذا كنت في متسع من الأرض و لم يتسع لك؟ أرأيت اذا اطرقت للسماء و وددت لو كنت طير لتحلق؟ حتى اذا ما مت يوم كنت قد بلغت في ما حييت الأفق ... الغربة شديدة, فحين لا تشعر بحلاوة بلادك و حين يأتي من السياح من ينشد فيها أشعار تجد أن في الأمر شيء غريب ... ضاقت بي الأرض بما رحبت و ضاقت بي البلاد بما اتسعت, فلم أعد أجد فيها شيء يفرج همّي و لا يشرح صدري ... أشعر بالغربة في وطني, ينتابني ذلك الشعور كلما رأيت تعسف أو سمعت عن ظلم ... هل ضاقت بك الأرض حتى صرت تبحث عن وطن مثلي؟ هل أتاك من الكرب ما حير مضجعك مثلي؟ هل علمت كيف يكون الظلم, و كيف يتعلل الظالمون بأنهم مأمورون ؟

غريب أمرهم, و ان كنت لا أعلم من الغريب أنا أم همّ, غريب أن لا تجد في "بلدك" ما يجده غيرك في غير أوطانهم, و غريب من لم يسر على خطى السواد الأعظم في هذا البلد, أحس بالغربة كلما رأيت ظلم أو تعسف, أحس بأني سأبكي الدم على وطني, وطني؟ و ما يكون من وطن اذا لم يتسع لأحلامي؟ اذا لم يتسع لطموحي؟ اذا كنت لا تجد فيه راحتك, اذا كنت ترى أن الأجنبي يتمتع بحقوق أفضل منك, اذا علمت أن لا حق لك الا في الهواء و في الانحناء تعبيرا على الامتنان و الولاء, و يا ليته كان ولاء للوطن, و الأكبر من هذا أن من يدعي الوطنية هم أشد الناس تمايل مع الريح حيث هبت ... هل أجد لهذه الغربة من مخرج غير الرحيل؟

أحس بالغربة حيث ما ذهبت, في البيت, في الشارع, في الجامعة, في مختبر البحث العلمي, فالقاسم المشترك أنك تنسف فيها أحلامك ... تنسف نسفا فتصير هباء منثورا ... لتذروه الرياح

ما الوطن اذا لم تجد فيها حقك؟ ما الوطن اذا لم ترى فيه للحق موطئ قدم؟ ما الوطن اذا لم ترى فيه مستقبل مشرق؟ ما الوطن اذا لم تجد فيه مبتغاك؟ ما لم تحس فيه بالطمأنينة , بالراحة, بكل ما قد ما قد يجعلك تحس بأنك انسان, بانك تستحق الحياة لأجله, أو لنقل بما قد يجعلك تحس بأنك حيّ ترزق ... فشتان بين حياة الكريم و حياة الذليل

ثم يأتي من يحدث عن الخروج من التخلف و الانحطاط, و الرقي و التقدم و ما الى ذلك من حديث تطرب له الأذن, و لكنك ترى على الأرض ما تنكره من أفعالهم, فهم كالذي جعل أرضه منبت لما طاب من خيرات و أطلق فيها من النعام ما يعوث فيها فساد و اذا حل موسم القطاف قال : أين ما زرعت و بذلت لأجله المال و الجهد؟

غريب في وطني, و لا أجد لهذه الغربة من مخرج... وطني ما بك ؟ ما الذي حصل لك فصرت لا تتسع لي و لا لما في صدري؟

يا موطن بذل فيه الغالي و الرخيص, ما الذي أصابك؟

موطني, موطني, موطني... ألا أجد فيك متسع لحلم و طير ؟

الى السيد النائب الموقر

وقت كنت صغير , كثير ما كنت نصدم برد " اسكت , ما تدخلش في حديث الكبار" أو " نقص من الحسّ" خاصة اذا كنت نحرج شخص من الكبار بسؤال ما يلقاش كيفاش يجاوب عليه, أو اذا ما أحرجته بتعليق لم يخطر على باله

في دروس التربية المدنية اللي كان يكثر فيها الحديث عن القانون و الحقوق و الواجبات, كان الصراع يحتدم و قلّ أن وجدت أستاذ قادر على الردّ من غير ما يخاف في تعليقه, و من بينهم أستاذ كان يقلي أن أسئلتي محرجة و أني أرتقي مرتق صعب مع بعض اللي يقريو فيّا, السبب أني كنت في بعض الأحيان أسأل عن أشياء بدت للبعض من المحرمات و بدت لي من المثيرات للشبهات فاخترت السؤال سبيل للبحث عن جواب

و في الجامعة, تدرس مادة كاملة, اسمها "حقوق انسان", شيء جميل أنك تعرف حقوقك و واجباتك, لكن لقيتها لا تغني و لا تسمي من جوع, علاش يحكلي على الاعلان العالمي لحقوق الانسان؟ أش نعمل بيه؟ وقتها سألت استاذي: شنوّا اللي ماش تزيدهولي المادة هذه؟

كان ردّه أني لازم نكون واعي بحقوق الانسان

" واعي؟" ... كيفاش واعي؟ ما نعرفش تعريف البعض للوعي, أما اللي نشوف فيه أن الوعي عندهم هوّ انه تسكر فمّك, و تقول الله يبارك و اذا لزم تصقف

هل الوعي يكون في الحجب الغير مقنن و بذل الأموال

هذا في كفة و الباقي في كفة, أما خلينا نرجعو للوعي , توا اللي يجي يحب يتظاهر و يحب يعبر على رأيه , موش تكريس للحقوق؟ و حق لنا أن نعبر عن ما نؤمن بيه؟

باهي نقبلو فكرة ان لغة الاحتجاج موش متعنا والا تشوف المتراك ترقص على جسدك على اعتبار انها الحلّ الامثل للحوار بين الأمن و الشعب, خاصة بعد أن كثرت الفيدوات اللي تصور الترحاب الحار اللي يتلقاه المواطنين من طرف القائمين على القانون

و مع هذا, تلقى شكون يختار أساليب أكثر تحظر على اعتبار ان الحوار هو السبيل, و يمشي السيد الكريم و يكتب رسالة الى نائب, و يتعب و يبدعث أكثر من جواب و يدفع حقهم و يقول التعب موش مشكلة و لا حتى الفلوس , المهم النائب الموقر اللي حفيت قدماه في المرور على السادة اللي بيدهم دفعه الى المنصب أو ابقائه حيث هوّا بين العامة, و بينهم المختنبين الكرام اللي كل واحد فيهم يعطيه صوته, و النهار اللي تستحقه يولي النائب موش موجود, تي وينك يا باشا؟

نكرت فينا؟ و الا توا معادش نهموك؟

صحى ليك, انك في عالم ما يحابش المسهولين السياسين اللي في منصبك على وعودهم الانتخابية ... في كندا صارت مرة أن أهلي منطقة, طالبو المرشح متعهم باش يتدخل لمهاجر من أمريكا الجنوبية باش يستقر في كندا لان في حالة انه رجع ممكن حياته تهدد , صحيح ما وصلناش للحالة هذه, أما بصراحة النائب اللي ما يحملش هم المواطن السماح فيه, و توا بعد ما عملنا برلمان للشباب, هل نتوقع أن نرى فيهم من يحمل عنّا السؤال الى المسؤلين؟

منحملوهمش أكثر من طاقتهم, ميزالو صغار و ما كبروش, أما اللي يشوف تطلوعاتهم, يقول هاذم ما يطالبو باستجواب وزير الاتصالات, زعمة تصير؟ تي الكبار معملوهاش و الصغار ماش يعملوها؟

منتصورش, تي أخر مرة كانت فيه الحكومة الموقرة أمام مجلس النواب, طلب رئيسه من النواب التقليق من المقدمات الجاهزة, أي نائب يجي يحكي مع وزير, يبدأ : انت الأول و الأخر و خير في من كان قبل و لما جئت صلح حال إدارتك

هل نتوقع من نائب يحكي مع وزير بالاسلوب هذا, يطالب باستجواب وزير؟ صعيبة برشا, أو انها من المستحيلات

هل يوجد من النواب من هو قادر على مخاطبة وزير هكّا؟

هذا مثال من مصر

قدّاش عنده الفيديو هذا منشور في الفايس بوك؟ مثماش نائب في البرلمان طلب بالاستفسار على اللي صاير ؟

اليوم منيش ماش نطالب باستجواب وزير أو حجب الثيقة عليه, اللي هيّا من المستحيلات أن يطيح البرلمان به, أما نطالب باستجواب ممثلي الشعب اللي تكاسلُ عن الإيفاء بمتطلبات مناصبهم ... أما لسوء الحظ , النواب ما نشوفوهم الا قبل الحملات الانتخابية و في التلفزة, بالطبيعة للي يتفرج على تونس 7

على الهامش: وين وصل جوابي؟ فين طيشتوه ؟

هل للحقّ نور؟

بين نور للحق و ظلام الكذب توجد مساحة رمادية, تسمح بالمنورة كيف اللي يعمل فيها بعض السمسارة متع حقوق الانسان.. لللي للي نهار و هوّ يعيط : حقوق انسان ... حقوق انسان... حقوق انسان

اذا شفته تقول هذا فيه أمل أنه يساهم في تحسن وضع البشرية, أما سعات تلقاه يوخر لتالي , تحك راسك, و تقول شبيه؟ أش صار؟ تعب؟

ممكن, علاش لا, ياخي هوّا موش انسان؟ ما يرهقش وقت يشوف ان النداء اللي يطلقه باش يولي للانسان كرامة يواجه بمزيد من التعذيب و التنكيل؟

لكن بعد مدة تتبين أنه موش في المستوى اللي يحاول أنه يصوره, مكش مصدّق؟

قداش من شخص انتقد النظام القمعي الايراني المقيت؟ اللي يقوم بالتعذيب و التنكيل بعرب "عربستان" في محاولة لتجريدهم من هويتهم العربية؟

أو خلينا نرجعلو لمدة الانتخبات الايرانية, اللي شهدت فيها مواجهات مع البسياج, اللي مهمته تتلخص في القمع و الترهيب

الناس الكلّ انتفضت وقالت : لا لقمع الحريات

لكن في قضية مروى الشربيني , شفنا شوية تراجع, أش صار؟

مروى الشيربيني اللي كانت ضحية متع عنصرية و اسلاموفوبي , الى الأن بعض "الحقوقيين" مقالش فيها كلمة حقّ , من غير ما نحكيو على معتقل جاونتنامو اللي الى اليوم المحاكم الفدرالية الامريكية تطلق في سراح أفراد ثبت عدم تورطهم في أعمال عنف

توّا بالمجد همّا حقوقيين و الا ضلاميين؟ علاش ما يحلوف فامهم؟ علاش ما يرفضوش الظلم في كل أشكاله؟

برّا نقولو كل هذا ما يعنيناش, أش يهمنا فيه اذا ماصراش في بلادنا , أما وقت يجي قانون مكافحة الارهاب اللي متع 2003 و يقول:

قانون عدد 75 لسنة 2003 مؤرخ في 10 ديسمبر 2003 يتعلق بدعم المجهود الدولي لمكافحة الارهاب

الفصل 12:

يعاقب بالسجن من خمسة أعوام إلى إثني عشر عاما وبخطية من خمسة آلاف إلى عشرين ألف دينار كل من يدعو، بأي وسيلة كانت، إلى ارتكاب جرائم إرهابية أو إلى الانضمام لتنظيم أو وفاق له علاقة بجرائم إرهابية أو يستعمل اسما أو كلمة أو رمزا أو غير ذلك من الإشارات قصد التعريف بتنظيم إرهابي أو بأعضائــه أو بنشاطــه

و اللي ما يعرفش أش معنها الارهاب, أما أقوى ضربة فيه هي هذه : " إرهابية أو يستعمل اسما أو كلمة أو رمزا أو غير ذلك من الإشارات قصد التعريف بتنظيم إرهابي أو بأعضائــه أو بنشاطــه"

قانون اعتباطي بشكل يخليك تفهم أنه جعل ليرضي الغرب... جعل ليكون أداة للضغط على الداخل, لكن أمريكا ماعندهاش صاحب... و الغريب اللي يصدق أنه مهما عمل ماش ينال الاستحسان متع الغرب مهما عمل

منيش ماش نبرر تفجيرات و أعمال قذرة, لكن نؤمن بحرية الفكر, بحرية المعتقد , بحرية أن يقول الانسان ما يؤمن به من غير ما يخاف, سواء يخاف السيّاف في العصور الغابرة أو يخاف أن يصير فيه ما لا يحمد عقباه... لاني نرفض لوغة "لدواعي أمينة" و لغة " نحن على صقيع ساخن" اللي هو أحلامهم المبنية على الظلم و التجبر.. ومحاولة لتبرير الظلم... البعض يلعب على الحبلين و يحب يعمل فيلم على اللي يتفرج عليه و باهت في عجب ربّي

اليوم نور الحقّ

اللي يقبع في السجن لانه عبر على فكره, حتى وان لم يرقني ما نشوفش انه ارهابي, أنه عمل حاجة غالطة , من حقه ان يعتنق الفكر اللي يسعده و من حقه أن يعبر عمّا يؤمن بيه حتى و ان اختلف معي و اختلف مع من حوله ... و الا شنوّا الي يعطي الحق لشخص باش يرد روحه رقيب على الفكر و على حرية التعبير؟

اللي يجي شكون يقول انه ارهابي و يجب زجهم في السجن أو اقامة المشانق لمن هم مثله ماهم الا أشخاص تمارس في الاقصاء بطرق مختلفة و تحت عدة مسميات

نور الحق, اللي الأن يقبع في غياهب الجبّ, ما هو الا ضحية لهذا القانون, اللي نشوف أنه يقمع أكثر مما يصلح ... و موش ماش يحسن في شيء

و رغم أني نشوف أن الشيوعية هي أكير جريمة في حق البشرية بحكم الجرائم اللي صارت حيث ما حكمُ كيف في الاتحاد السفياتي حين قتل 40 مليون و في كمبوديا حين قتل الخمير الحمر 1.5 مليون في 4 سنين من الحكم

و بخلاف اضطهاد المتدينين من المسيحيين و المسلمين و اليهود بحجة أن الدين هو معارض للقيم الشيوعية ... الا أني نرفض اللي صارلهم في الوليات المتحدة وقت صارت ملاحقة و زجهم في السجون في الحرب الباردة لانه قمع للحريات ... منيش ماش نقل ان نوصلو للانحلال الأخلاقي كيف ما هو صاير مع المثاليين ... و منيش ماش نقبل زادة وجود دولة في وسط دولة أخرى أو أن يجي شكون يطبق قانون و هو لا يمثل السلطة القضائية ... لكن نؤمن أن لك فرد حرية المعتقد و ليس له حرية التطبيق

أكبر مثال يعجبني هو المثال البريطاني للحريات و ان شابته شائبات, اللي يسمحلك بحرية التعبير لكن يعاقب المخالفين, ممكن موش مثال كامل و نقيّ بحكم اللي صار من انتهاك للحريات, لكن نشوفه أنه مثال يعطي الكثر من الحريات

و كيف ما ساندت حقّ التعبير و رفض الإقصاء, اليوم نعلن أني أرفض قانون مكافحة الإرهاب و نعلن مساندتي لنور الحقّ اللي نشوفه مظلوم... و نشوف أن الدولة العادلة هيا اللي تسمح لكافة الأطياف بالتعبير عن ذاتها مع الحفاظ على الأمن العام

النساء و الزمان ما فيهمش أمان

قبل عدّة أشهر قدمت لتربص في شريكة الشيء اللي يفرض عليا نفيق بكري شوية باش نوصل للبيرو اللي نعدي فيه في الستاج متاعي, فبحكم تخصصي فأنا مطالب بتربص, و كنت قد اخترت اني نقوم بيه في البلاد ... أهم حاجة قريب

و الحمد لله, ان البيرو هذا يبعد علينا نصف ساعة

دخلت على الصباح, و لقيت عمّ علي واقف يعمل في تالفون, تعديت بحذاه و سلمت عليه, و تعديت للبيرو اللي في جنبه نلقى سي محمد يعمل في سيجارو على الصباح... الوقت القانوني لبداية الخدمة هو 8:00, لكن مع السخانة و الصيف, فالخدمة تبدأ مع 10:00, و الوقت المنقضي من 8 الى 10, يتعدى في تلفون , سيجارو , شوية حديث على الماتش, شوية حديث على برنامج في تونس 7 أو حنّابعل ... هذا هوّ برنامج كل نهار

دخلت, و مشت للبيرو اللي نخدم عليه, قعدت شوية قبل ما يوصل زيميلي ... السيدّ الكريم, عروس جديد, و هذا أول نهار يرجع فيه بعد الكونجي متع العرس متاعه

دخل, و بدأ المهنون...و كيف كل الموجودين مشيت باركت, توافد كل اللي يخدمو يباركُ و يهنّيوُ

بعد عدة دقائق من الأحضان و عبرات الشكر, جاء للبيرو اللي بحذايا, و قعد, هو في الاصل البيرو متاعه, لكن بحكم غيابه حصلت بعض التغييرات و أصبح ملاصق للبيرو متاعي

قعد الأخ الكريم, و طلب الستوندار باش ياخذ خطّ و يعمل اتصال خارجي, حاجة عادية, و متهمنيش

بعد ما بدأ الاتصال و قعد يحكي بصوت يسمع القراب منّه, ليتبين أنه يحكي مع صديقته وقاعد يحكيها على تفاصيل شهر العسل متاعه ... شيء غريب, توّا هو ما عندوش جمعة من اللي عرس, و باقي مصوحب؟

وقتها تفكرت عبارة : الرجال و الزمان ما فيهمش أمان

جاء وقت الرجوع للبيت, و في الثنية نلقى جاري , وليت روحت معاه, و قعدنا نحكيو في الكار... لين وصلنا قدّام معهد قريب, وقتها على غفلة شفت طيور الحبّ

من بينهم جارتي, شيء غريب.... تي قاعدة مع شاب ... تلفت لجاري وقتله: ياخي موش ماش تعرس الجمعة الجاية هذه؟

ردّ عليا: أيه, أما هذا الواقفة معاه شدّان يدّ , و متع العرس هذكا هو الرسمي

شعب من ورق

وفات القراية , و حان موعد الهجرة الى الديار, و مفارقة الأصحاب... بعد ما توصل تشوف ان بعض الحوايج تغيرت و البعض الأخر لم يتغير... كيسات جديدة و ديار جدد و قهاوي اللي تبارك الله, في ازدياد مستمر

بعد التجول تقرر العودة للبيت و الاكتفاء بما رأيت...نوصل المحطة, نقعد نستنا , مثماش حاجة تبدلت, الكار باقي تجي مخّر

بعد عشرين دقيقة توصل و يوصل الشوفير يجري باش يلح الوقت اللي ضيعه, تطلع و تشد كرسي... و تبدأ الرحلة

بحكم ان الكرسي اللي خذته في مقدمة الحافلة فمن الطبيعي أن اي حركة من الشوفير نجم نتابعها... لكن الشيء اللي عجبني برشا, هوّ مدا قدرته على السياقة بد وحدة, اذا علمت أن اليد الثانية فيها التلفون اللي كان يحكي فيه, شكون ماش يكلمه؟

في منتصف الطريق, جاء السيد المسئول على الخلاص أو ما يعرف بالخلاص, و قرب للشوفيه , و همس : ثمّا واحد قال انه حاكم, يخلص و الا ما يخلصش

فرد عليه الشوفير: أناهو؟

الخلاص: هو موش باين عليه حاكم, أما شاكك فيه

مفهمتش كيفاش يبان عليه انه حاكم و الا سبب ان البعض يعرف نفسه بكلمة حاكم في حين أنه عون/ضابط أمن , شخص ساهر على تطبق للقانون .... أما الشوفير قام بتوجه الحافلة للمركز, و رساتلنا في 20 دقيقة تأخير

وصلنا قدّام المركز و هبط الخلاص و مشاء يعيط للأمن, دقائق و يرجع و معاه عون بالزّ المدني, طلع , و انصب في مقدمة الحافلة أمام عون من حرس المرور اللي كان في مقدمة الحافلة, و قال: وينه؟

بكل ثقة قالها العون

جاء الأخ الكريم منتحل صيفة "الحاكم" و هبط ذليل ليحمل الى غياهب المركز... بعدها بدأ الشوفير و الخلاص في مرحلة جديدة, تتكون بشكل أساسي من التفاخر بالانجاز العظيم, و بالضحك بأعلى الصوت ... وصلو مرحلة من النشوة اللي تخليك تسأل شنوّة قيمة الانجاز اللي قامو بيه... و الا شنوّة اللي تبدل بين عشرين دقيقة قبل اللحظة هذه و ساعة الانتصار... شنوّ اللي يخليه ينتقل من الهمس الى الفخر... موش حاجة كبيرة

أما هذا شعب من ورق

زميلي اللي ميضويش

في مثل هذه الأيام منذ عدة سنوات, كنت تلميذ بكالوريا, كنت كيف برشا من اللي يحلم بأنه يتحصل على معدل ممتاز يمكنه من النجاح و السفر بعد الحصول على منحة تمكني من الدراسة في الخارج, برشا أحلام, كنت نحظر في روحي باش نكمل في أوربا أو أمريكا الشمالية, لكن لعدة اسباب, منها اني وصلت منهك و حتى مريض شفت أحلامي تتبخر أمامي, و تراجعت أعدادي في المناظرة... لهذا فهي من بين أكثر الفترات اللي كل ما تذكرتها , أحسست ببكثر من الانزعاج.

ممكن اللي يقلق أكثر هو تصرفات بعض من من كنت أعدهم من الاصدقاء, اللي صارت منهم أشياء مكانتش في المستوى, كيف انه يخبي عليك امتحان قديم رغم انه يجي ويطلب منك نسخ أخرى يشوفها عندك و يقلك معنديش اذا تطلب منه انتي حاجة

برشا حوايج صارت, خلاتني اليوم نشوف ان البعض رغم انه يضحك في وجهك لا يترد في انه يضربك في قفاك

منيش نحكي على فرد و انما عدة افراد, برشا عباد, متحبش تشوفك تفوتها, البعض يخبي عليك موعد امتحان أو يحاول انه يقصيك أو حتى يعملك مشكلة مع المحيط متاعك و البعض يجيك من الأخر و يقلك ما نعطيش و حتى في التوجيه الجامعي

في المدرسة التحضيرية بربرتوار , قول اللطف - تشوف العجبّ لانك على موعد مع المناظرة الوطنية للدخول لمدارس المهندسين, و يعرف انه بقد ما يكون الترتيب أحسن يكون عندك القدرة على الدخول للمدارس الأرقى: بوليتكنيك , سيبكوم, انيت , انسي... الخ الخ

تقرأ من الصباح للعشية , ريتم يحرق, لكن رغم كلّ هذا بعض الأساتذة تسرق في الدرس اللي تقري بيه من كتب فرنسية, و تشوفه في القسم يحاول يعمل إسقاط للاصلاح باي شكل حتى اذا هو فارغ و موش قادر يوصل ... وقتها الحل هو انك تلقى الدرس و الكتاب و تستخدمه في المراجعة للامتحان

الكتب غالية, البعض يفوت ال100 دينار و البعض بين ال50 – المرفق فيهم- و ال80 دينار, بالنسبة لشخص ياخذ المصروف من عند بوه, باش يشري خمسة كتب لازمته 300 دينار على الأقل لهذا جرات العادة على أن الجيل القديم يخلي كل شيء للجيل الجديد, و نهار اللي تم التوجيه, أول حاجة هي تمشي تحكي مع بعض اللي تعرفهم للبحث عن امكانية الحصول على التركة الثمينة: امتحنات قديمة و كتب و دروس متنوعة

لكن تفاجئ بأن حقيرا قد مرّ على الجميع و قام بجمع كل شيء و لم يترك لغير اي شيء, تحك راسك و تقول في سذاجة, موش مشكلة تي هو قراء معيا و زيد على هذا صاحبي, و تبدأ تقرأ و تمشي تحكي معاه و تقله عندك شيء من التركة؟

يقلك : و الله ما عندش, شيء مادبرت شيء

و يحلف و يحسسك انه في نفس المشكلة اللي انتي فيها... لكن اللي تعرف تخبيه, لآنه موش باهي تجرح الناس

و تجي القراية و ياخذ منك كتاب تكون تحصلت عليه و مخبيتش على المحيط متاعك و تخلي اي صديق أو زميل ياخذ يطبع منه اللي يحب, و معادش يرجعه, وقت تقله وينه يقلك رجعته و يزيد يحلف المريض... و ما يحشمش, تي هو ما يعرفش أش معنا الحشمة

" ان لم تستحي فاصنع ما شئت"

صدق رسول الله صلى الله عليه و سلم

و نهار اللي يشوف واحد من أصحابك الكتاب عنده و قله هذا كتاب فلان و شبيك ما رجعتوش و هو يلوج عليه, يقله : ايه صحيح, أتو نرجعو

و ما يرجعش

في الاثناء تشوف ان "اسبري كونكور" يقوا برشا, لدرجة ان اللي تحسنله و تعطيه الحاجة يردهالك بضربة و غدرة الا ما رحم ربّي

و بعد كل هذا يجي و يقلك / اهلا بخويا العزيز

على الهامش: عندي برشا مواد و امتحنات فرنسية للبربارتوار, اذا ثمّا شكون حاجته بهيم ممكن نحاول نرفعهم في أقرب فرصة